Si yo poko boukante’w tan’n
2 min read
Doulè platonnen bobin Egzistans
Lavi pa bay fil a nesans
Elevwa pou bwas..
Lekol kraze lapatèt nou
Ak Ti bout ke sosyete a san jilèt
Fas koripsyon n’ap fè koule
Menm nan van lespwa nap fè tèt
Nan chache sakad chanjman
Solèy boule plastik ki kouvri nou
Yon jenès ti kap 🪁
K’ap domine grandou…….
Nou son ze 🥚ki Pat fèt pou pouri
Men pito pou’n te kale🐣
Kòm leta pa sispann pèdi plim
Yo Mete’n kouve anba vant krim
Nou gen zye 👁️ selman pou dlo kouri
men pou sak fè’n mal ki pa gendwa kale👀
M’ta renmen konn Koman èt siprèm nan santi’l🤔
A chak fwa yo fè lanmò pran lavi Yon jèn pou enbesil ?….
N’ap viv sou 2 pye’n
Ak Yon beki nan panse’n
Kòm yo paka soude pye’n
Pou’n pa leve kanpe
Ak plis trajedi chak jou y’ap rekonpanse’n
Malgre’n trase koub ki pase nan enfini
Sa pa anpeche’n ale dwat anba kout bèk malfini
Ak règ ki di: si se yo k’ koupab nap swiv
Tout inosan ap pase a l’enfinitif
Youn pa Youn Piti kou gran n’ap fini
San bag lanmò epouze tan’n
Lavi’n voltije tankou blad nan touf pikan
Se pa pou blag si’m pa janm di adieu a sak ale yo, m’selman konnen yo pran devan
Jodi pou yo, men demen, mw yo mèt tann….
Nan koulè san’n kounya lakansyèl fè nofraj
Gen sa ki debou toujou, san fòs san kouraj
Yon sosyete tòl wouye sou avni jèn k’ap koule beton
menm devan sak antò nou pèdi rezon
Yo pa sispann tchake karaktè’n
Ki fè Se ak bal madichon bandichay koupe lonbrik mizè’n…….
Mackenson JEAN
Le parolier
